مادے کی کیمسٹری

سائنس

قسط 7: مادے کی کیمسٹری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مادہ چاہے ٹھوس ہو، مائع ہو یا گیس، تین قسم کے ذرات سے بنا ہوتا ہے۔ 

⁦▪️⁩ایٹمز (Atoms)

⁦▪️⁩مالیکیولز (Molecules)

⁦▪️⁩ آئینز (ions) 

نیز جو مادہ آپ دیکھتے ہیں، کیمیائی لحاظ سے یہ تین قسم کا ہوتا ہے۔

⁦▪️⁩عنصر یا element

⁦▪️⁩مرکب یا compound

⁦▪️⁩آمیزہ یا mixture

سائنس میں آگے بڑھنے سے پہلے، مندرجہ بالا اصطلاحات کے بارے میں بنیادی معلومات یاد رکھنا بہت ضروری ہے۔ چاہے آپ بور ہوں یا دلچسپی سے پڑھیں، انہیں یاد رکھنا بہرحال بہت ضروری ہے۔ 

تو آئیے ان کا جائزہ لیتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

1۔ ایٹم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

🔹ایٹم کی ساخت کے بارے میں گذشتہ قسط میں تفصیل سے بیان کیا جا چکا ہے۔ ایٹم کسی عنصر کا وہ چھوٹے سے چھوٹا ذرہ ہے جو اس عنصر کے تمام خواص اپنے اندر رکھتا ہے اور مزید توڑنے سے اس کے یہ تمام خواص ختم ہو جاتے ہیں۔

🔹ہر ایٹم تین بنیادی ذرات سے بنا ہے۔ الیکٹران، پروٹان اور نیوٹران۔

🔹پروٹان اور نیوٹران بھاری ذرات ہیں اور ان کی کمیت ایک جیسی ہوتی ہے۔ یہ دونوں قسم کے ذرات نیوکلئس میں پائے جاتے ہیں۔

🔹پروٹان پر مثبت چارج ہوتا ہے جبکہ نیوٹران پر کوئی چارج نہیں ہوتا۔

🔹الیکٹران بہت ہلکا ذرہ ہے اور یہ نیوکلئس کے گرد تیز رفتاری سے گردش کرتا رہتا ہے۔

🔹الیکٹران پر منفی چارج ہوتا ہے مگر اس کی مقدار پروٹان کے مثبت چارج کے برابر ہوتی ہے۔ یعنی جہاں ایک پروٹان اور ایک الیکٹران ہوں وہاں چارج نیوٹرل ہو جائے گا۔

🔹ایک ایٹم میں الیکٹران اور پروٹان کی تعداد ہمیشہ برابر برابر ہوتی ہے۔ جبکہ نیوٹران کی تعداد پروٹان کے برابر یا تھوڑی سی زیادہ ہوتی ہے۔

🔹سب سے دلچسپ بات یہ ہے کہ کائنات کے تمام ایٹموں کے الیکٹران، پروٹان یا نیوٹران میں معمولی سا بھی فرق نہیں ہوتا۔ 

مثلاً مرکری کے ایک ایٹم میں 80 پروٹان ہوتے ہیں۔ اگر اس کا ایک پروٹان نکال دیا جائے تو یہ سونا بن جائے گا، کیونکہ سونے کے ایک ایٹم میں 79 پروٹان ہوتے ہیں۔ یا آپ اس کا الٹ بھی کر سکتے ہیں۔ 

اسی طرح سونے سے مزید ایک پروٹان نکال دیں تو یہ پلاٹینم بن جائے گا۔

🔹🔹اب آتے ہیں ایٹم کے سائز کی طرف۔۔۔۔ ایک ایٹم اتنا چھوٹا ہوتا ہے کہ آپ اس کا تصور تک نہیں کر سکتے۔ اگر کاربن کے ایک ایٹم کی مثال لیں تو اس کا قطر (diameter) 0.154 نینو میٹر ہوتا ہے۔ ایک نینو میٹر، ایک ملی میٹر کا دس لاکھواں حصہ ہے۔ گویا جب آپ اپنی پنسل سے کاغذ پر صرف ایک نقطہ لگاتے ہیں تو اس نقطے میں کاربن کے کروڑوں ایٹم سمائے ہوئے ہوتے ہیں۔

🔹کائنات میں بمشکل 120 اقسام کے ایٹم پائے گئے ہیں۔ چونکہ ایک عنصر میں ایک ہی قسم کے ایٹم ہوتے ہیں، اسلئے عناصر کی تعداد بھی اسی قدر ہے۔ لیکن ان ایٹموں سے بننے والے مالیکیولوں کی تعداد لاکھوں نہیں بلکہ کروڑوں تک جا پہنچی ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2۔ مالیکیولز Molecules

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

🔹دو یا دو سے زائد ایٹموں کے متحد ہونے سے تشکیل پانے والا ذرہ مالیکیول کہلاتا ہے۔ 

مثلاً پانی کا ایک مالیکیول ہائڈروجن کے دو ایٹموں اور آکسیجن کے ایک ایٹم پر مشتمل ہے۔ چنانچہ اس کا فارمولا H2O ہے۔ 

اسی طرح آکسیجن گیس کا ہر مالیکیول آکسیجن کے دو ایٹموں پر مشتمل ہے۔

🔹کسی ایٹم کے مالیکیول بنتے ہی اس کی خصوصیات حیرت انگیز طور پر غائب ہو جاتی ہیں اور بالکل نئی خصوصیات وجود میں آتی ہیں۔ مثلاً ہائڈروجن ایک گیس ہے جو اڑنے والے غباروں میں بھری ہوتی ہے اور آکسیجن بھی گیس ہے، جس سے ہم سانس لیتے ہیں۔ مگر جب ان گیسوں کے ایٹم 2:1 کے تناسب سے متحد ہوتے ہیں تو پانی جیسی شاندار شے وجود میں آتی ہے جس کے خواص نہ آکسیجن جیسے ہیں اور نہ ہی ہائڈروجن جیسے۔

🔹اس طرح مالیکیولوں سے بنی ہوئی اشیاء مرکبات کہلاتی ہیں

🔹وہ قوت جس سے ایٹم متحد ہو کر مالیکیول بناتے ہیں، کیمیائی بانڈ کہلاتی ہے۔ مالیکیولوں میں عموماً کوویلنٹ بانڈ ہوتا ہے۔

🔹کائنات میں مالیکیولز کی کروڑہا اقسام پائی جاتی ہیں، مگر یہ سب انہی معدودے چند ایٹموں سے بنتی ہیں۔

🔹بعض مالیکیول بہت بڑے ہوتے ہیں جو کئی سو یا کئی ہزار یا کئی لاکھ ایٹموں سے بنتے ہیں جیسا کہ پروٹین یا اسٹارچ کا ایک ہی مالیکیول ہزاروں ایٹموں پر مشتمل ہوتا ہے۔ اس قسم کے مالیکیولز اکثر و بیشتر پولیمرز کہلاتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

3۔ آئین Ions

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

🔹ہر ایٹم یا مالیکیول چارج کے لحاظ سے نیوٹرل ہوتا ہے۔ لیکن اگر اس میں سے ایک یا زائد الیکٹران نکل جائیں یا اضافی آ جائیں تو یہ آئین کہلاتا ہے۔

🔹آئینز کی دو اقسام ہیں۔ مثبت آئین یا کیٹائن اور منفی آئین یا اینائن۔

🔹عام کھانے کا نمک سوڈیم کلورائیڈ مرکب ہے مگر اس میں مالیکیولز کی بجائے آئینز پائے جاتے ہیں جو کہ "آئینی بانڈ" کے ذریعے باہم متحد ہوتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

4۔ عناصر Elements

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

🔹ایسا خالص مادہ جس کے تمام ایٹموں میں پروٹانز کی تعداد ایک جیسی ہو، عنصر کہلاتا ہے۔

🔹سونا، چاندی، لوہا، تانبہ، نکل، زنک، سیسہ، کرومیم، پلاٹینم، کوئلہ، گندھک، فاسفورس، سلیکان وغیرہ سب عناصر ہیں۔

🔹پروٹان کی تعداد کے لئے اٹامک نمبر کی اصطلاح استعمال کی جاتی ہے۔

🔹تمام عناصر جو کہ 118 کے لگ بھگ ہیں، دھاتوں، غیر دھاتوں، ٹھوس، مائع اور گیس پر مشتمل ہیں۔

🔹جن عناصر کا اٹامک نمبر 83 یا اس سے کم ہوتا ہے غیر تابکار ہیں جبکہ 83 سے زیادہ نمبر والے تمام عناصر تابکار ہیں۔

🔹عناصر کی ترتیب کو پیریاڈک ٹیبل سے ظاہر کیا جاتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

5۔ مرکبات Compounds

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

🔹دو یا دو سے زائد عناصر کیمیائی بانڈ کے ذریعے متحد ہو کر مرکبات کی تشکیل کرتے ہیں۔

🔹پانی، چینی، پٹرول، گھی، نمک، میٹھا سوڈا، نوشادر، شیشہ، ریت، چاک، چونا وغیرہ سب مرکبات ہیں۔

🔹مرکبات کی دو اقسام ہیں۔ نامیاتی (organic) اور غیر نامیاتی (inorganic)۔

🔹غیر نامیاتی مرکبات میں کاربن سمیت کوئی سا بھی عنصر ہو سکتا ہے مگر نامیاتی مرکبات میں کاربن کا ہونا لازمی ہے۔

🔹جانداروں کے بیشتر مرکبات مثلاً پروٹین، کاربوہائیڈریٹس، لیپڈز، امائنو ایسڈز وغیرہ نامیاتی ہوتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

6۔ آمیزہ mixture

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

🔹دو یا زائد خالص اشیاء یعنی عناصر یا مرکبات کے طبعی ملاپ سے بننے والی شے آمیزہ کہلاتی ہے۔

🔹آمیزہ میں نئی خصوصیات پیدا نہیں ہوتیں بلکہ تمام اشیاء اپنی خصوصیات قائم رکھتی ہیں۔ 

مثلاً پانی میں چینی گھول دی جائے تو اس میں پانی کی تمام خصوصیات بھی قائم رہیں گی اور یہ میٹھا بھی ہوجائے گا، جو کہ چینی کی خصوصیت ہے۔

🔹دودھ، شہد، لکڑی، ہوا، شربت، چائے، کولڈ ڈرنکس، پینٹ سب آمیزے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جاری ہے