سائنس : قسط 8: بائیولوجی کی دنیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بائیولوجی کی دنیا کیا ہے؟ ایک جہانِ حیرت کدہ و طلسمِ ہوشربا ہے۔

سائنس کی اس شاخ کا بھرم صرف ہمارے کرۂ ارض نے رکھا ہوا ہے۔ سیارۂ زمین نہ ہو تو بائیولوجی کا کوئی وجود نہیں (کم از کم انسانی علم کی حد تک ایسا ہی ہے)

بائیولوجی میں زندگی اور تمام جانداروں کا مطالعہ کیا جاتا ہے۔ 

اس کی تین بڑی شاخیں درج ذیل ہیں۔

1۔ زولوجی (Zoology):

اس شاخ میں حیوانات کا مطالعہ کیا جاتا ہے۔

2۔ بوٹنی (Botany)

بائیولوجی کی یہ شاخ نباتات سے متعلق ہے۔

3۔ مائکرو بائیولوجی (Microbiology)

اس شاخ میں خوردبینی جانداروں مثلاً بیکٹیریا وغیرہ کا مطالعہ کیا جاتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جانداروں کی اکائی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تمام جانداروں کا جسم بہت چھوٹی چھوٹی ساختی و فعلی اکائیوں سے تشکیل پاتا ہے، یہ اکائی خلیہ یا سیل cell کہلاتی ہے۔ 

سیل کی دریافت تو اپنی جگہ ایک منفرد واقعہ ہے ہی، مگر اس سے بھی زیادہ اہم اور شاندار واقعہ خورد بین (microscope) کی ایجاد ہے۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مائکروسکوپ کی ایجاد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

⁦▪️⁩پہلی صدی عیسوی میں جو شے ایجاد ہو چکی تھی وہ شیشہ تھا۔ یہ اپنی شفافیت کی بنا پر بڑی نفیس شے جانا جاتا تھا۔ رومن اسے کثرت سے استعمال کرتے تھے۔ 

⁦▪️⁩تیرہویں صدی عیسوی میں اس شیشے سے بنے عدسے سے عینک کا کام لیا جانے لگا۔ عینک میں استعمال ہونے والا محدب عدسہ ایک سادہ سی مائکروسکوپ ہی ہے۔ 

⁦▪️⁩اس مائکروسکوپ میں انقلابی تبدیلی اس وقت آئی جب دو عدسوں کو ایک نلکی میں جوڑ کر سن 1590 میں مرکب خوردبین ایجاد کر لی گئی۔ اس ایجاد کا سہرا ہالینڈ کے چشمہ ساز زاکاریا جانسن اور اسکے والد ہینز کے سر ہے۔ 

⁦▪️⁩سن 1609 میں گیلیلیو نے اس کے ڈیزائن میں بہتری پیدا کی۔ اس کے ساتھ اس نے دوربین بھی ایجاد کی اور کائنات کی گتھیاں سلجھانے کے سفر پہ چل نکلا۔

⁦▪️⁩سن 1663 میں معروف برطانوی سائنسدان رابرٹ ہک نے مائکروسکوپ کی مدد سے پہلی بار سیل دریافت کیا۔ اس کے لئے اس نے کارک کی باریک قاشوں کا بغور معائنہ کیا۔ اس میں اسے خانے خانے سے بنے نظر آئے۔ چونکہ خانے کو لاطینی زبان میں cellula کہا جاتا ہے، اس لئے اس نے انہیں سیلز کا نام دیا۔ یوں پہلی بار بائیولوجی سیل کے جہانِ حیرت میں داخل ہوئی۔

⁦▪️⁩دس سال بعد سن 1673 میں ہالینڈ کے بزنس مین، لیوون ہوئک Leeuvenhoek نے اپنی دلچسپی کی بنا پر لینز کی بناوٹ کو بہت بہتر تراشا اور پالش کیا۔ اس سے بنائی گئی مائکروسکوپ اتنی طاقتور تھی کہ اشیاء کو دوسو گنا سے بھی زیادہ بڑا کر کے دکھا سکتی تھی۔ 

اس مائکروسکوپ کی مدد سے اس نے جو کچھ دیکھا، وہ دنیا نے کبھی نہیں دیکھا تھا۔ اس نے خون میں سرخ سیلز دیکھے، پانی کے قطرے میں متحرک جاندار دیکھے، یک خلوی پروٹوذوا کو دیکھا، فنجائی دریافت کئے اور ان سب سے بڑھ کر پہلی بار بیکٹیریا دریافت کئے۔

⁦▪️⁩سن 1673 میں لیوون ہوئک نے رائل سوسائٹی لندن کو خط لکھ کر اپنی دریافتوں سے آگاہ کیا۔ اگلے پچاس برس تک اس کی سوسائٹی سے خط و کتابت رہی۔ سن 1723 میں اس کا انتقال ہو گیا۔

⁦▪️⁩اپنی ایجاد سے دو صدیاں بعد تک بھی مائکرو سکوپ اس قابل نہیں تھی کہ سیلز کے اندر کی تفصیلات دیکھ سکے۔ سن 1833 تک یہ قدرے بہتر ہو چکی تھی، اسی سال معروف سائنسدان رابرٹ براؤن نے سیل میں نیوکلئس دریافت کیا۔ 

اب سائنسدانوں کی ساری توجہ کا مرکز و محور سیل تھا۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سیل تھیوری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سن 1838 میں دو جرمن پروفیسرز شلیڈن اور شوان نے سیل تھیوری پیش کی۔ یہ تھیوری دو نکات پر مشتمل تھی۔

1۔ دنیا کے تمام جاندار سیلز سے بنے ہیں۔

2۔ سیل کسی بھی جاندار کی ساختی اور فعلی اکائی ہے۔

سن 1855 میں جرمن سائنسدان روڈلف ورچو نے اس میں تیسرے نکتے کا اضافہ کیا۔

3۔ تمام سیلز پہلے سے موجود سیلز سے ہی پیدا ہوتے ہیں۔

(اہم نوٹ: پہلا سیل کیسے پیدا ہوا؟ یہ معاملہ ارتقاء کا ہے۔ اس سوال کا جواب نظریۂ ارتقاء کے پاس ہے)

جدید بائیولوجی میں سیل تھیوری میں تین مزید نکات شامل ہو چکے ہیں۔

4۔ سیلز میں وراثتی اطلاعات ہوتی ہیں جو اس کی تقسیم کے ذریعے اگلی نسل کے سیلز میں منتقل ہو جاتی ہیں۔

5۔ کیمیائی ترکیب کے لحاظ سے بنیادی طور پہ تمام سیلز ایک دوسرے سے مشابہ ہوتے ہیں۔

6۔ زندگی کی توانائی کا بہاؤ ، میٹابولزم کی صورت میں سیلز کے اندر وقوع پذیر ہوتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جاری ہے